A principios do ano 2012,
Fran Godón propuxo ó Concello da Pobra do Caramiñal organizar un obradoiro
teatral dirixido a adolescentes da vila. Xurdiu o Obradoiro Dramático P-12
(Pobra 2012). Pretendía ser un proxecto cultural e artístico que procurase esperta-lo
interese pola arte dramática na xente máis nova. Como obxectivo secundario
estaba profundar con estes mozos en diversos conceptos teatrais. Configurouse
un grupo de sete mozas, que de seguido quedou limitado a cinco, e foise optando
por outra vía de traballo ó observa-lo director a riqueza dos contidos
transversais que posuían as propostas feitas polas actrices. Fixouse como
obxectivo traballar sobre a situación da muller na sociedade actual e en
distintos ámbitos socioculturais.
Axudadas polo director as
mozas foron elaborando uns personaxes e unhas historias nas que se reflexionaba
sobre algúns problemas das mulleres no noso mundo dando como resultado final
unha pequena peza dramática titulada Retrato con muller ó
fondo, que finalmente foi representada no teatro municipal e noutros locais
da zona. Posteriormente decidiuse dar continuidade ó proxecto formativo e xorde
o P-13, coas mesmas protagonistas e o mesmo director. Optouse por monta-lo
texto CINZA, de
Fran Godón, e xorde consecuentemente a compañía.
